А в богоспасаемом Царственном граде Киеве тогожде месяца августа, на память Преподобнаго отца нашего Пимина Великаго бысть обхождение окрест всего великаго верхняго города Киева с Кресты, с чудотворною Иконою Пресвятыя Богородицы КиевоПечерскою, (яже никогда по то время не бяше от Церкве Пресвятыя Богородицы из Обители Печерския движима) с честным Крестом, в нем же бе часть животворящаго древа Креста Господня и мощи многих Святых Угодников Божиих, и спрочиими святыми Чудотворными Иконами, при его Царскаго пресветлаго Величества Боярине и Воеводе Киевском, Князе Иоанне Борисовиче Троекурове и при Окольничем Иоанне Ивановиче Ржевском. Такожде в трудех бяше и сам Всечестный Господин отец Иннокентий Гизель, Архимандрит Святыя КиевоПечерския Обители, с прочими честными Игуменами святых Монастырей Киевских, и иных множество многое духовнаго и мирскаго чину людей; все еле не чрез весь день летний труждахуся, за чудотворною Иконою Пресвятыя Богородицы ходяще, и в умилении и сокрушении сердца молебное пение и молитвы к Спасителю Богу и к спасающей от бед Пресвятой Богородице приносяще; и толиким новым подвижением чудотворныя КиевоПечерския Иконы пресвятыя Богородицы изрядно чудо и всемирная радость соделася. В тойже бо день под Чигирином возбранныя Воеводы и заступницы Христианом непостыдныя заступлением внезапу нападе на горделивыя поганы страх и трепет велий, и абие превратишася в бегство полки чужды с великим и никогда еще не бывшим толиким посрамлением и зельною пагубою сил Бесурманских, иже невидимою силою Божиею гоними быша сице, яко безпрестанным бегством во дни и в нощи истомльшеся, множество их велие везде по пути погибе, едва прочии от превелика страха Божия в своя си угонзнуша; град же Чигирин свобожден бысть от всяких бед, и запятая сеть суеумнаго намерения Агарянскаго на богоспасаемый Царственный град Киев аки паучина сокрушися; а мы все помощию Господа, сотворшаго Небо и землю, по заступлению Пресвятыя Богородицы, ходатайством Святых Российских чудотворцов, Преподобных Отец наших Антониа и Феодосиа и прочих КиевоПечерских, и всех Святых молитвами, изрядным щастием Великаго Государя нашего Царя и Великаго Князя Феодора Алексеевича всея Великия и Малыя и Белыя России Самодержца под его высокою Государскою рукою добре избавлены быхом.
112.
О ВТОРОМ БЕСУРМАНСКОМ
приходе под ЧИГИРИН.
В ЛЕТО ОТ РОЖДЕСТВА ХРИСТОВА 1678 жестокосердый он богопротивник Турский Солтан в лютой ярости и скорби сердца своего сый, хотя мимошедшую пагубу людей своих и студ лица своего безчестнаго утолити, еще большии свои Турецкии и Татарскии силы подвиже, и посла с поганым Визиром своим, именем Мустафою, и с многими башами под Чигирин доставати его. Тыи басурманскии силы пришедше месяца Июля числа 8 к Чигирину, доставаху его различными промыслами, приступами, страшною огненною стрельбою, гранатами, подкопами и всякими наветы, чрез многое время нудящеся злое намерение свое совершити: но многу пагубу себе тамо пристяжаху. Ибо ратнии его Царскаго пресветлаго Величества люди под властию умнаго мужа, его Царскаго пресветлаго Величества Окольничаго и Воеводы Чигиринскаго, Иоанна Ивановича Ржевскаго, а войско Запорожское бодростию Полковника Чигиринскаго, Григория Карповича, и иных таможе бывших храбрых начальников войсковых промыслом, мужественно противу тех неприятелей подвизахуся, как от стен градских всякою стрельбою стреляюще и отбивающе, так и из града исходяще, по шанцах поганских многое множество янычаров убиваху, и на поле частые бои сводяще, без числа Турков и Татаров поражаху и живых много начальных и простых поган имаху, яко толикому Божиею силою укрепляемаго православнаго воинства мужеству, промыслу, дерзновению и нарочитой храбрости богатырской зело дивитися Бесурманом; и уже неприятели в унынии и малодушии суще, по большой части бяху в отчаянии, мняще намерения своего не совершивши, с печалию и вечным студом своим или от града отступити, или все на приступах в конец погибнути.
113.
О ПРЕСЛАВНОЙ ПОБЕДЕ
над Турками и Татарами бывшей на горе.
ЕГДА ЖЕ БОЛЬШИИ силы его Царскаго пресветлаго Величества при Боярине и Воеводе Князе Григории Григорьевиче Ромодановском, и многии полки войска Запорожскаго, при Гетмане Иоанне Самойловиче с Богом данною ему благонравною отраслию, Симеоном, у Днепра снийдошася; абие вси купно силою крепкаго в бранех Господа вооружившеся, поидоша Июля 31 с поля Бужинскаго к Чигирину на отсечь своих с всеми обозами просто в очи неприятелеви, ополчившемуся окрест Чигирина. О сем услышавши Визир Турецкий, аще в большом еще страсе и ужасе оста, но аки в дерзновении сый, понудися седмьнадесят Башей с многими Бесурманскими силами и Хана Крымскаго с всеми ордами и янычарскую пехоту послати противу войск православных, усилуя проходы путные запяти им, и уже на тесных местах и переправах нужных заступивше, всячески от всех стран на обозы Государевы и Московскии и Козацкии неприятели налегаху и немалыя перепоны содеваху. Православное же войско мужественно в храбрости воинской подвизающеся, нарочитый отпор неприятелем на все страны даваху, во всяком дерзновении все праволучно идуще противу Бесурманом на гору, от Черкас до реки Чигиринской Тясмина лежащую, к выводу зовомаго Кувичинскому. Неприятели же войсками своими гору ту окрывше и все удобныи восходы на ню Янычарами с многою огненною стрельбою засадивше, отнюд восхода Христианским воем возбраняху; чесо ради гора та от множества неприятелей, от высоты и труднаго восхода своего, аки некий страшный облак с огненным дождем и лютыми громы стреляния Бесурманского над православными вои висяше, даже под нею вои Царскаго Величества принудишася премедлити день и две нощи во всяком труде и теснотах. Но зде десница Господня сотвори силу. Зде множеством славы своея сотре Бог сопротивных, егда силою Креста Господа, сильнаго в бранех, православнии вооружившеся, Августа 3 числа в день субботный, изряднее же чинным управлением благоразумнаго вождя войск Запорожских все полки двигнушася, храбрии вои предваряюще, обозы же им последующе, просто на гору тщахуся, и во всяком дерзновении и мужестве сердца на обозы и войска Бесурманскии наступаху. Тогда лук сильных изнеможе, а немощнии препоясашася силою. Ибо предстательством Пресвятыя Богородицы, непостыдныя Христианския надежды, ходатайством Преподобных Отец Печерских и всех Святых пособием, купно же и явлением Преподобнаго Отца Сергия, Игумена Радонежскаго, великаго чудотворца, и щастием и молитвами благовернаго Государя нашего Царя и Великаго Князя Феодора Алексеевича, всея Великия и Малыя и Белыя России Самодержца, внезапу лютому оному супостату одолеша православнии вои и отнюд прегордаго того Кагана премогоша.
Бесурмане же видяще толикую нечаемую в Христианских воех храбрость и мужественное сердце их, аки сердце льва на лов го&товаго, абие нечестивыи падше в страх и трепет, растаяшася падше в страх и трепет, растаяшася в мнимой крепости сил своих поганских, от шанцов же и от всех армат (пушек) больших и меньших оружий огненных, от наметов и от всяких запасов своих отбегоша, стремглав един другаго предваряющи и друг друга оставляющи утекаху, аможе очима зряху, яко и ту исполнитися писанному, поженет един тысящу и два двигнета тмы. Ибо стрелы православных воев изобильно упишася от крове Бесурманския, и меч без числа снеде мяс их поганских, начальных, Башей и Мурз; много же и живых поган в руцех Христианскаго войска остася, и утекающии на своих же мостах, на реце Тясмини помощенных, от великаго страха и тесноты многое множество подавися, с мостов спадающе, и без числа потопишася. Наметы же, арматы (пушки), запасы и многии корысти неприятельскии храброму его Царскаго пресветлаго Величества воинству досташася. Тогда все Христоименитыи вои утешахуся крепостию силы Бога Вседержителя, хваляще и величающе его, яко единаго победителя, побеждающаго и смиряющаго врага вознесенную гордыню, дающаго же неоскудно крепость православному Цареви нашему, и возносящаго рог Христа своего.
114.
О ПРИШЕСТВИИ ПОД ЧИГИРИН
войск православных.
ПО ТОЛИКОЙ ТОРЖЕСТВЕННОЙ победе над Бесурманами вси обозы ратнии Царскаго Величества и войск Запорожских на гору вышереченную воздвигшеся, приидоша под Чигирин Августа 4 числа и сташа под городом над рекою Тясминем. Тогда жестокосердый враг Визир Турецкий от презельныя туги и студа своего, ради великия пагубы своих нечестивых, еле богохульныя души своея не испроверже. Все же оставшие Бесурмане устремилися бяху всеконечне на бегство, а православныи войска в победительном торжестве суще, надеяхуся всяко тому супостату падшему уже не востати. Лютый же супостат Христанскаго рода Диавол, от обилия своея злобы, лукаваго онаго Визира, яко свойственный свой сатанинский сосуд, от последняго уныния и малодушия, аки от смертоноснаго сна возбуждши, пусти его оставшия вои Бесурманския от намереннаго бегства удержати. Той же мало помалу в чувство пришедши, исполнися ярости и всякия неправды, и размысли, яко уже не возможно воинскими приступами града Чигирина взяти и явным боем противу мужественных сил Христианских постояти, вдадеся в тайныя злохитрныя коварства, в них же непрестанно упражняшеся дотоле, и яко тать подкопавшеся землею под нижний город, восхити его и огнем сожже. Ратныи же его Царскаго пресветлаго Величества с арматами, всяким оружием и запасами вышедши из города верхняго, зажгоша его, а сами цело проидоша к обозом сил Государских и Козацких полков.
