Херувимская песнь
Ныне силы небесныя с нами невидимо служат; се бо входит Царь славы, се жертва тайная совершена дориносится. Верою и любовию приступим, да причасницы жизни вечныя будем. Аллилуйа, аллилуйа, аллилуйа.
Псалом 90
Живый в помощи Вышняго, в крове Бога Небеснаго водворится. Речет Господеви: Заступник мой еси и прибежище мое, Бог мой и уповаю на Него. Яко Той избавит тя от сети ловчи и от словеси мятежно, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы, летящия во дни, от вещи во тьме преходящия, от сряща и беса полуденнаго. Падет от страны твоея тысяща и тма одесную тебе, к тебе же не приближется. Обаче очима Твоима смотриши и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближется телеси твоему; яко Ангелом Своим заповесть о тебе, сохранити тя, во всех путех твоих. На руках возмут тя, да некогда преткнеши о камень ногу твою, на аспида и василиска наступивши и попереши льва и змия. Яко на Мя упова, и избавлю и покрыю и, Яко позна имя Мое. Воззовет ко Мне, и услышу его; с ним есмь в скорби; изму его, и прославлю его, долготою дний, исполню его и явлю ему спасение мое.
Молитва от чародейства
Господи Иисусе Христе, Сыне Божий, огради мя святыми Твоими ангелы, молитвами Всепричистыя Владычицы нашея Богородицы и Приснодевы Марии, силою Честного и Животворящего Креста, святаго архистратига Божия Михаила и прочих Небесных сил бесплотных, святаго, пророка, Предчети и Крестителя Господня Иоанна, святаго апостола и евангелиста Иоанна Богослова, священномученика Киприана и мученицы Иустины, святителя Николая, архиепископа Мир Ликийских, Чудотворца, святителя Льва, епископа Катанскаго, святителя Никиты Новогородскаго, святителя Иосафа Белгородскаго, святителя Митрофана Воронежскаго, преподобнаго Сергия, игумена Радонежскаго, преподобных Зосимы и Савватия Соловецких, преподобнаго, чудотворца, святых мучениц Веры, Надежды, Любови и матери их Софии, святаго мученика Трифона, святых и праведных богоотец Иоакима и Анны и всех святых Твоих, помози мне, недостойному рабу Твоему (имя молящегося) , избави мя от всех навет вражниих, от всякого зла, колдовства, волшебства, чародейства и от лукавых человек, да не возмогут они причинити мне никоего зла. Господи, светом Твоего сияния сохрани мя заутра, и полудне, и вечер, и на сон грядущего и силою благодати Твоея отврати и удали всякая злая нечистия, действуемая по наущению диавола. Аще кое зло замыслено или соделано есть, возврати его паки в преисподнюю. Яко Твое есть царство, и сила, и слава, Отца и Сына и Святаго Духа. Аминь.
МОЛИТВЫ ОБ ИЗБАВЛЕНИИ ОТ ХУЛЬНЫХ ПОМЫСЛОВ
Молитва
Боже превечный, сокровенных свидетелю, испытуяй сердца и утробы, седяй на Херувимех, и видяй бездны, разумеваяй помышения моя издалеча. Ты веси, яко ми ненавижду, не хощу, и не соизволяю нечистым, мерзким, хульным помышлениям, безстудне на мя нападающим, и молю Твою благость, запрети духу хульному, да отступить от мене, отжени мысли злыя, да не стужают ми, утиши волнение сердца моего, укроти бурю помыслов моих, посрами врага, смущающаго совесть мою, да не порадуется враг мой о мне: Тебе бо трепещут и трясутся противнии дуси, Тебе послушают всяческая, Тебе работна суть вся: Ты повели буре и волнению ума моего, да станет в тишину, да без сумнения и смущения поработаю Тебе Господу моему во вся дни живота моего. Аминь.
Молитва
Господи! Зриши ми скорбь, зриши мою беду, зриши и безстудие врага моего, яко люте и тяжце нападает на мя хульными помыслы, оскорбляя душу мою, опечаляя сердце мое, помрачая ум мой, и смущая совесть мою егоже богохульнаго шептания и богомерзкаго во уме моем глаголания только ненавижду, яко первее умрете хотел бых, неже сия на Тя благого Бога моего помыслы хульныя прияти и сим соизволити, яже враг мой во уме моем вещат, но за слабость мою тым противным, и богохульным и богомерзним мыслем одолети, и от себе я отгнати не могу без Твоея, Боже мой, помощи: естество бо мое страстно, ум непостоянен, сила моя немощна, супостат же мой крепок и сила его превосходит моя силы, и аще не бы Ты Господь крепок силен был в людех Своих, то кто доволен цел сохранен быти от врага и человекоубийцы диавола. Тем припадаю Ти, о всемилостивый и премилосердый, не хотяй отчаяния моего, Создателю Боже, и молю всесильную Твою помощь, порази на главу стужающаго ми врага, блесни молнию, и раждени обышедшии мя супостаты, возсияй светлую в сердце моем благодати Твоея зарю, да отбежит от мене темный облак хульных заходящих на мя мыслей, да в свете помощи Твоея узрю Тебе Христа моего, просвещающаго всякаго человека, да в свете лица Твоего пойду, и о имени Твоим возрадуются во веки. Аминь.
Молитва против беса хульнаго
Да обратися болезнь твоя на главу твою, и на верх твой хула твоя да снидет, лукавый бесе и нечистый: аз бо Господу Богу моему кланяюся и того никогда же похулю. Како бо ми возможно сему досадити, или Его похулити, Его же по вся дни и нощи и часы славословлю, и покланяюся от всея души моея, и крепости и мысли моея. Но убо славословие мое есмь, хула же твоя есть, ты узриши, о нихже нань клевещеши, и яко отступник на Бога глаголеши.
Запрещение диаволу
Запрещает ти, вселукавый душе, диаволе, Господь пришедый в мир пречистою и святою Девою воистину Богородицею на спасение миру нас деля грешных. Проклят еси ты, и вся неприязненная твоя помышления, яже в нощи и во дни. Заклинаю тя именем единосущныя и нераздельныя Троицы, Отца и Сына и Святаго Духа, отступи от мене раба Божия (имярек) , не влагай в сердце мое помыслов неприязненных, но отъиди в места пуста и безплодная, идеже не присещает Господь. Заклинаю тя, нечистый и богохульный душе, именем Господа нашего Иисуса Христа, не блазнити, ни смущати мя хульными помыслы, всегда сотворити ми молитвы моя к Господу Богу моему, но да будут вся твоя хульная помышления на твою главу в день судный: аз бо Господу Богу моему служу, и ому единому возсылаю молитву во дни и в нощи, тебе упраждняющу, мене же милующу и укрепляющу, и оставляющу ми за многую Его благость и милость вся прегрешения. Иди за мною, сатано, и проклят буди ты, и вся неприязненная твоя и противная сила, яко благословися и прославися пречистое имя Отца, и Сына, и Святаго Духа, ныне и присно и во веки веков. Аминь.
Ко пресвятей Богородице
Пресвятая Владычица моя Богородице, святыми Твоими и всесильными мольбами отжени от мене окаяннаго раба Твоего уныние, забвение, неразумие, нерадение, и вся скверная, лукавая и хульная помышления от окаяннаго моего сердца, от помраченнаго ума моего; и погаси пламень страстей моих, яко нищ есмь и окаянен. Избави мя от многих и лютых воспоминаний и предприятий, и от всех действ злых свободи мя. Яко благословенна еси от всех родов, и славится пречестное имя Твое во веки веков. Аминь.
К Богу
В руце Твоего превеликаго милосердия, о Боже мой, вручаю душу и тело мое, чувства и глаголы моя, советы и помышления моя, дела моя, и вся души и тела моего употребления: вход и исход мой, веру и жительство мое, течение и кончину живота моего, день же и час издыхания моего, преставление мое и упокоение, и воскресение души и тела моего со всеми святыми избранными Твоими. Ты же, преблагий и человеколюбивый Боже, приими мя в руце защищения Твоего, и избави мя от всякаго зла, прости премножество грехов моих, очисти оскверненную ми душу и тело и сохрани мя в крове милости Твоея во вся дни живота моего, яко да Твоею благодатию укрепляемый избавлюся от ловящих мя сетей вражиих, и Твоею благостынею в чувство приведен, и на путь истиннаго покаяния наставлен, сподоблюся христианския кончины животу моему, безстрастныя, непостыдныя, мирныя, и немятежнаго от воздушных духов прешествия, и добраго ответа на страшном Твоем суде, и да сподоблен буду зрения неизреченныя Ти славы, и слышания преславнаго Твоего благословеннаго Ти гласа, и у Тебе Бога моего да получу жизнь и спасение. Аминь.
После сего следует читать псалом 27: «Господь просвещение мое и Спаситель мой», а также «Достойно есть» и отпуст.
Если сможешь творить поклоны, и поклонов сотвори по силе; этим способом, при помощи Божией, избавишься от хульных помыслов.
Великомученику Никите
О великий страстотерпче Христов и чудотворче, великомучениче Никито! Припадающе ко святому и чудотворному образу твоему, подвиги же и чудеса твоя и многое сострадание твое к людям прославляюще, молим тя прилежно: яви нам смиренным и грешным святое и многомощное твое заступление. Се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити, но тебе молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя дары душам и телесем нашим: веру правую, спасения надежду несомненную, любовь же ко всем нелицемерную во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на Страшнем Суде Христове. И всем людем православным яви твое святое заступление: болящия исцели, скорбящия утеши, бедствующим помози. Ей, угодниче Божий и мучениче долготерпеливый! Не забуди святую обитель твою и вся живущия в ней и подвизающияся инокини же и мирския, но поспеши им во смирении и терпении носити иго Христово, и от всяких бед и искушений милостивне избави. Всех убо нас приведи в тихое пристанище спасения, и наследники сподоби быти пресветлаго Царствия Христова святыми твоими молитвами. Да славим и поем великия щедроты Отца и Сына и Святаго Духа в Троице славимаго и поклонямаго Бога, и твое святое заступление во веки веков. Аминь.
