Таисия Олейникова - Бог в помощь. Молитвы для жизни, здоровья и счастья

Молитва о находящихся в запрещениях и себя клятвою связавших

Владыко Господи Боже наш, Единородный Сыне и Слово Отчее, Иже всяк соуз грех наших Твоею страстию растерзавый, Иже дунувый на лица Твоим апостолом и рек им: Приимите Духа Святаго, и ихже аще оставите грехи, оставятся им, ихже аще держите, удержатся. Ты Сам, Владыко, святыми Твоими апостолы даровал еси по времени священнодействующим во святей Твоей церкви на земли оставляти грехи, и вязати и решити всякий соуз неправды, молимся убо и ныне о брате нашем (имя), предстоящем пред Тобою, подаждь ему Твою милость, разреши его соуз греховный, аще что в неведении или небрежении глагола, или от малодушия содела, ведый человеческую немощь, яко Человеколюбец и Благ Владыка, вся вольныя и невольныя грехи прости ему, яко Ты еси милуяй окованныя, возставляяй низверженныя, надеждо ненадеющихся, упокоение падших, и раба Твоего сего свободи от соуза греховнаго, яко прославися Твое всесвятое имя, со Безначальным Твоим Отцем и Святым Духом, ныне и присно и во веки веков. Аминь.

Господи Иисусе Христе, Боже наш, Боже всякаго милосердия и щедрот, Егоже милость безмерна и человеколюбия неизследимая пучина, ко Твоему Величеству припадающе, со страхом и трепетом, яко раби недостойнии, благодарение Твоему благоутробию о Твоих благодеяниих, на рабех Твоих бывших, ныне смиренно приносяще, яко Господа, Владыку и Благодетеля славим, хвалим, благодарим, поем и величаем, и, припадающе, паки благодарим, Твое безмерное и неизреченное милосердие смиренно моляще. Да якоже ныне моления рабов Твоих прияти, и милостивно исполнити сподобил еси, и во предняя в Твоей и искренняго любви и во всех добродетелех преспевающих, Твоя благодеяния всех верных Твоих получити сподоби, Церковь Твою святую, и град сей (или весь сию), от всякаго злаго обстояния избавляя, и мир и безмятежие тем даруя, Тебе, со Безначальным Твоим Отцем и Пресвятым и Благим и Единосущным Твоим Духом, во Единем Существе славимому Богу, всегда благодарение приносити, и преблагая глаголати и воспевати сподобиши. Слава Тебе, Богу, Благодателю нашему, во веки веков. Аминь.

Создателю всех, Боже, семена благословляяй и умножаяй, и к употреблению нашему сия благопотребна творяй; ходатайством Предтечи и Крестителя Иоанна, милостивно внемля молитвам нашим, пчелы сия благословити и освятити Своим благоутробием благоизволи, да обильнее плоды своя приносят, во еже ко храму Твоему и святых олтарей Твоих лепоте и украшению, купно же и нашему употреблению быти им, о Христе Иисусе Господе нашем, Емуже честь и слава, во веки веков. Аминь.

Боже Всемогий, Предвечный, содержаяй горстию всю тварь, обладаяй небом и землею, и всеми, яже на них, всякому же созданию, еже на пользу быти щедро подаяй: умиленно молим Ти ся, Всеблаже, якоже древле израильтяном, землю медом и млеком текущую даровати, в пустыни Иоанна Крестителя Твоего дивиим медом воспитати благоизволил еси: такожде ныне призрения Твоего благоволением к живопитанию нашему, сей пчельник и его улья благослови, умножая преумножи в нем пчелы, и благодатию Твоею я соблюдающи, тучнаго нас меда исполни: да никако сей пчельник созданий Твоих пчельных лишен, но всегда преисполнен соты меда будет: и по премногой благостыни и непобедимей крепости Твоей, да явится неподвижим многими лукавствы, и непоколебим зазорными обаянии, но Твоею всесильною огражден державою, и остенен ополчением, от всякаго коварства волшебнаго сохранен, и всегда в Твоей, Христе, рукояти невредим пребудет. Твое бо есть, еже миловати и спасати ны, Христе Боже наш, и Тебе славу возсылаем, со Отцем и Святым Духом, во веки. Аминь.

Боже, трудом человеческим и бессловесными животными благодействовати ведый, и неизреченным милосердием Твоим семех пчел плоды и дела к нуждам нашим употребляти научивый, смиренно молимся величествию Твоему: пчелы сия благословити изволиши к приобретению человеческому роду умноже я, снабдевая их, препитавая, да кийждо на величество Твое и безмерныя щедроты Твоя уповаяй, в хранении же сих животных труждаяйся, трудов своих обильныя плоды сподобится восприяти и небеснаго благословения исполнится, о Христе Иисусе Господе нашем, Емуже честь и слава во веки веков. Аминь.

И кропят ульи святою водою трижды.

Господи Боже наш, от пречистыя и пребогатыя длани Твоея, предлежащее пред очима Твоима семен подаяние принесохом, Владыко, и сему Тебе вручитися молимся: не бо смеяхом в бездушных земли недрех заключити сия, аще не воззрим на повеление Твоего Величества, повелевающее родити и прозябати земли, и дати семена сеющему, и хлеб в снедь. И ныне молимся Тебе, Боже наш, услыши ны, молящияся Тебе, и отверзи нам сокровище Твое великое, и благое, и небесное, и излей благословение Твое, донележе удовлимся по неложным Твоим обещанием, и отжени от нас вся снедающая плод наш земный и всякое наказание праведно наводимое на ны, грех ради наших: и богатыя Твоя щедроты низпосли на вся люди Твоя, благодатию и человеколюбием Единороднаго Твоего Сына, с Нимже благословен еси, и с Пресвятым и Благим и Животворящим Твоим Духом, ныне и присно и во веки веков. Аминь.

Господи Иисусе Христе, Иже лоза сый истинная, и Отец Твой делатель, Ты и апостолы нарекл еси рождиями; тако и ныне, Владыко, прииди на лозу сию, и насади; даждь ей хранителя помощь Твою, огради входы и исходы ея Твоим Промыслом: избави ю от всякаго обстояния ея, от града, снега, мраза, от грозныя зимы и ветров сожжения, от бури и от всякаго нахождения, видимых же и невидимых врагов. Призри и посети виноград сей, егоже насади десница Твоя, да воздаст во время плоды своя; и да сподобимся и мы Твоею благодатию обимати его, и принести Тебе от него, во еже претворитися в кровь Пречистаго Тела Твоего. Тебе бо подобает всякая слава, честь и поклонение, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Господи Боже наш, в начале создания Твоего сотворивый небо и землю, и небо убо украсивый великими светилы, еже просвещати на земли и чудитися теми Тебе Единому Содетелю и Владыце твари, землю же украсивый злаком и травою и различием семен, сеемых по роду, и всю, цветы покрыв в благоукрашение, благословил еси ю. Сам и ныне, Владыко, призри от святаго жилища Твоего на стяжание сие и благослови е, сохрани е неврежденно от всякаго чарования и обаяния и всякаго зла, оплазнства же лукаваго и коварства лукавых человек, и даждь ему приносити плоды во время, исполнены благословения Твоего, и всякаго зверия и гада, червь же и мухи и ржу, зной и вар, и безгодныя ветры, вред наносящия, отжени от него, яко освятися и прославися пречестное и великолепое имя Твое, Отца и Сына и Святаго Духа, ныне и присно и во веки веков. Аминь.

Господи Боже наш, Источниче благих, повелевый земли извести плод, благоутробия ради Твоего и благости, благослови и умножи и гумно сие, и плодоношение рабов Твоих; исполни сокровища их всякаго благаго плода, пшеницы, вина и елеа, и сохрани их от всякаго искушения, со всеми сущими у них, и просвети их в познании Твоем, да благоугодни Тебе бывше, сподобятся вечных Твоих благ, яко благословися Твое имя, Отца и Сына и Святаго Духа, ныне и присно и во веки веков. Аминь.

Владыко Господи Боже наш, Твоя от Твоих приносити Тебе по предложению коемуждо повелевый, и вечных Твоих благ воздаяние сим даруяй, иже вдовы по силе приношение благоугодно приемый, приими и ныне принесенныя от раба Твоего (имя) и в вечных Твоих сокровищах возложитися сим сподоби; даруй ему и мирских Твоих благ обильное восприятие, со всеми полезными ему, яко благословися Твое имя, и прославися Твое царство, Отца и Сына и Святаго Духа, ныне и присно и во веки веков. Аминь.

Господи Боже Вседержителю, словом Твоим всяческая исполнивый, и возрастити повелевый земли вся плоды во своя времена, и даяти я в радость и в живот человеком. Ты Сам, Всеблагий Владыко, и семена сия, с различными зелиями принесенная во святый храм сей, благослови и освяти Духом Твоим Святым, и рабов Твоих сих, приемлющих зелия сия с семенами, от всякия скверны очисти, и домы их всякаго благовония исполни, во еже быти сим и всем верою хранящим я, и кадящимся ими в соблюдение и избаву от всех вражиих прилогов и во отгнание всякаго мечтания, от действа диавола находящаго, дневнаго и нощнаго, на благословение же душам и телесем, верным Твоим людем и скотом, домовом же и местом. Яко да вси, приемлющии сия зелия, восприимут себе покров души и тела, и да будет нашему спасению врачевство Твоея благодати таинство: да в коем месте возложится, или на коем употребляемо будет, во еже получити благословение, вся (противней силе оттуду прогнанней) десница Твоя да покрывает, во славу пресвятаго, великолепаго и всепоклоняемаго имени Твоего, Емуже подобает всякая слава, честь и поклонение, со Отцем и Святым Духом, ныне и присно и во веки веков. Аминь.