622. Брат извещение прием о сих, вопроси тогожде великаго старца тако: рече боголюбие твое, яко может грешный грехи своя покаянием разрешити. Что убо? Еда не требует и молитвы святых, но довлеет собою самем? Аще ли же и не покажет истиннаго покаяния сам, святии же помолятся о нем, не разрешаются ли тех ради греси его?
Ответ. Аще и человек не сотворит еже по силе и не примешает того к молитве святых, ничимже пользуется молящимся святым о нем. Аще воздерживаются ни за него, и молятся о нем, той же сластолюбствует и безчинствует, что пользует моление их еже о нем? Сбывается бо зде реченное: един созидаяй, а другий разоряяй, что множае успеют, токмо труды (Сир. 34, 23)? Зане, аще бы возможно было сему быти, да тай, о немже бы молилися святии, не внимая себе поне мало что, спасался бы, то не было бы препятствия, да и о всех грешных мира сего сие творят. Но аще мало что потрудится и грешный, требует и молитвы праведнаго. Глаголет бо апостол: много может молитва праведнаго поспешествуема (Иак. 5, 16), то есть: да, егда молится зань святый и праведный содействует и грешный по силе своей, покаянием молению святых, не доволен сый сам един ко отданию долгов. Зане той убо мала совносит, моления же святых многая. Якоже бо, аще кто имать нужду понести десять спуд пшеницы, и ниже два может, обрящет же человека боящася Бога, и той понесет от нея девять спуд оныя и оставит ему един, то соблюдает его, да спасется, а не на пути от разбойник убиен будет: тако и зде. Паки подобен есть грешный человеку должну сушу сто златиц, иже напомянен быв от заимодавца о отдании долга, пойде ко иному человеку благочестиву и богату и моли его дати ему по любви, якоже может; он же, человеколюбив сый и видя скорбь его, милосердовав рече ему: брате, что-либо имам в руку моею, даю за тя, и свободишися от рукописания. В должнице убо есть потщатися малая дати, и многих свободитися. Аще бо не увидит он милосердый человек, яко принесе он десять златиц, не хощет той девять, десять дати: ведый, яко заимодавец не даст рукописания, аще не исполнятся должныя сто.
Вопрос 623. Христолюбец некий вопроси инаго старца Иоанна: молю тя, отче: скажи мне вещь сию, да, исполнен быв веселия, отыду в дом мой: понеже помысл имам сотворити благотворение от имений моих, что полезнейше есть, по малу ли да сотворю, или единою?
Ответ. Брате, аще аз и несмь доволен отвещати тебе, якоже подобает, но имаши вразумление Писания глаголющо: не рцы, отшед возвратися, и за утра дам, сильну ти сущу благотворити. Не веси бо, что породит находящий день (Притч. 3, 28). Меры же суть: и един кийждо по мере своей творит. Есть бо человек, иже может мала от приходов своих даяти и есть другий десятую часть от имения своего; ин четвертую часть, другий третию, а ин половинную; кийждо по своей мере, хотяй же приити в совершенную меру, мене последнейшаго да не вопрошает, но Учителя и Врача душ наших, Господа нашего Иисуса Христа, рекшаго богатому оному: «Аще хощеши совершен быти, иди продаждь имение твое, и даждь нищим, и имети имаши сокровище на небеси, и гряди в след Мене» (Мф. 19, 21). Да укрепит же помысл твой пришествие смерти, сокровенно бо есть от всякаго человека. Потщимся убо сотворити благое, прежде неже отыдем от жизни сея. Не вемы бо, в кий день хощет быти звание наше: еда како не готови обрящемся и останем вне чертога с пятию буими девами, не вземшими елеа в сосудех со светилники своими. Сотворим же силу по немощи нашей, и благ есть всех Владыка, еже ввести нас с мудрыми в чертог Свой, в радость неизглаголанную со Христом. Аминь.
Вопрос 624. Брат вопроси тогожде старца: подобает ли приимати от имех и даяти нищим, за еже быти некиим, на сие убеждающим?
Ответ. Понеже о милостыни есть дело, не вси вмещают понести глаголемая, но доспевшии в безмолвии быти и плакати грехов своих. Суть бо нецыи вручающе себе на таковое служение, и Бог весть, что сотворит с ними о сем. А плачущии не имут праздна времене на сие. И како бо отрекшийся своих си, чуждих взыщут строители быти? И иже во святых, преподобный Иларион, сие сотвори: молен бо быв от некиих немала имения прияти на подаяние, рече молящему и: яко тебе подобает своя раздати, занеже и грады обходиши, и веси познаваеши: аз же оставивый и своя, како прииму раздаяти чуждая? Ибо от сего и вина многажды бывает тщеславия или сребролюбия.
Вопрос 625. Аще убо любопрится хотяй дати, глаголя: яко аще не приимеши и раздаси, то не хощу сам раздати ничтоже: убо подобает ли оставити нищих страждущих от глада?
Ответ. Якоже рех любви твоей, яко суть нецыи учинившии себе в сие: ты же аще хощеши плакати грехов своих, не внимай сему чуждему делу: аще и пред келлиею своею увидиши кого удавляема (мучащагося). Да не приобщишися чуждему раздаянию, и отщетиши себе от плача и безмолвнаго седения. Но господин имения, не обретая творящаго ему служение сие, должен есть сам сотворити, во еже не возбранитися делу его.
Вопрос 626. Христолюбец некий вопроси тогожде старца, глаголя: аще кто просит кого, дати ему милостыню, и не имать: еда ли должен есть взаим взяти и дати?
Ответ. Аще кто просит (кого) дати, еже не имать, осуждения не имать. Ибо и апостол Петр, просимь дати милостыню, рече: сребра и злата несть у мене (Деян. 3, 6). И не взят взаим, да подаст. Аще ли же кто и свою точию потребу имать, то ни тако подобает сию, якоже прилучися, истощити, да не оскудеет ему, и оскорбится, не терпя скудости. Аще ли же, стужаемь, речет просящему: прости мне, не имам чесо дати тебе, то се не есть ложь. Не имый бо, разве потребы, сей не имать дати другому.
Точию да речет просящему: прости мя, имущаго точию (за свою) потребу. Помяни пять дев, яже, бывше просимы от инех дати им елеа во светильники их, реша им: еда не достанет нам и вам (Мф. 21, 9). И апостол же Павел, пиша к Коринфяном, глаголет: да будет ваше избыточествие во онех лишение (2 Кор. 8, 14). И не бо да иным убо отрада, вам же скорбь (2 Кор. 8, 13).
Вопрос 627. Скажи ми, отче, яве, яко рекл еси: аще кто потребу (свою) точию имать, не должен есть тую, якоже прилучися, истощити, да не поскорбит. И како бывает поскорбети кому о волею бываемых от него?
Ответ. Вся подобает с разсуждением творити. А еже умерити себе, разсуждение есть, и утверждение помыслу, еже не смутити себе по сих. А еже паче силы творити, или милостыню, или ино что, не разсуждение есть. Послежде бо в смущение, и уныние, и роптание приводит творящаго. Добро бо, и зело добро, якоже и вдова одна, даяти требующему, и несть дело зло, но яко человек паче силы творя, не может понести. И Бог, яже по силе, ищет.
Вопрос 628. Аще убо кто есть богат, и имать паче потребы своея, не требует ли ктому таковаго разсуждения? По силе бо своей творит и той.
Ответ. Ей, требует и той разсуждения (благотворити), да не обрящется творя паче силы помысла своего и раскается о бывшем. Сего ради и Павел рече: не от скорби, ни от нужды: доброхотна бо дателя любить Бог (2 Кор. 9, 7). Совершенная бо совершенных суть, умаленная же умаленных. Совершенный бо и нищету доблественне терпит, и о богатстве нерадит, и вся без смущения носит, по рекшему апостолу: вся могу о укрепляющем мя Христе (Флп. 4, 13). И: мне мир распятся, и аз мирови (Гал. 6, 14). И прочая.
Вопрос 629. А иже из начала не усерден есть на подаяние, что должен есть сотворити, яко да навыкнет подаяти?
Ответ. Воспоминати сам себе должен есть о еже от Бога воздаянии за подаваемая и начинати от последних вещей и всегда вразумляти себе: яко мало подаваяй, мало приемлет. А многая (подаваяй), и сам много приемлет, по реченному: сияй скудостию, скудостию и пожнет. А сеяй о благословении, о благословении и пожнет (2 Кор. 9, 6). И по малу малу вожделевает помысл его воздаяния многих и присно успевает на совершение. И таковый может в совершенныя меры приити, обнажити себе земных вещей и быти духом с небесными.
Вопрос 630. Аще кто, совосхитився неразсудно, истощит в благотворение потребы своя, и (последи) раскается, како должен есть себе утешати, да не диаволею скорбию поглощен будет?
Ответ. Да укорит себе прежде о неразсуждении, и да возведет от печали помысл свой, глаголя: яко внегда на дело благое расточися, то силен есть человеколюбец Бог помиловати мя и устроити мя по воли Своей.
Вопрос 631. Аще приидут два нища, и не имам дати обема, коего от двою предпочту?
Ответ. Немощнейшаго подобает предпочести.
Вопрос 632. Аще ли же хощу дати, и сумнитмися помысл не дати, что сотворю?
Ответ. Вопроси его: и аще обрящеши его, яко по скупости сие творит, даждь и еще мало нечто паче онаго, еже должно было дати, например: едину медницу, и имети будеши милостыню.
Вопрос 633. Скажи мне и сие, господине авво: не имый откуду дати, како будет сопричастник благословения, реченнаго от Спаса к сущим одесную Его: приидите благословеннии Отца Моего, наследуйте уготованное вам царствие от сложения мира: взалкахся бо, и дасте Ми ясти, и прочая?
