Вопрос 699. Ин христолюбец, странноприемлющ отцы, посла писанием, вопрошая тогожде старца: полезно ли ему отврещися совершенно мира и приити во иноческое житие? И егда отписа ему старец, яко совершеннейшо есть отшествие, возмнев, яко по заповеди ему слово речено бысть, оскорбе зело, и помысли ктому не вопрошати отцев ни о чемже. Сие разумев старец духом, рече написати ему сия:
Ответ. Прежде всех целуем о Господе любовь твою, и просим тя всякий помысл печален отложити, и со радостию и страхом Божиим прочести и выразумити преднаписанная тебе в первом послании. Ниже бо по заповеди написахом вам что, навыкше от апостола, глаголющаго: не да сило вам наложу, но разсуждающе в вас едино коеждо дело, кое имать пользы различие, якоже вси слышахом Спаса, во Евангелиях глаголюща писанная в законе: еже не прелюбы сотвориши, не убиеши, и прочая.
Вопросившему Его же рекшу: вся сия сохраних, что есмь еще не докончал? Глагола ему о совершенстве: аще хощеши совершен быти, продаждь имение твое, и прочая, яже веси. Но доброненавистник присно обходит, запиная всякому делу благу. Ведя бо написанную вам пользу, и прежде неже уразумети вам силу написанных, вмале не смути помысла вашего. И удивитися мощно, како покрывает ум человека, восхищая помысл его, якоже бы совершенно не спользоватися ему: и не оставляет его вопросити себе, чесого ради смущается, и рещи себе: «вскую прискорбна еси душе моя; и вскую смущаеши мя; уповай на Бога, яко исповемся Ему» (Пс. 41, 6) и прочая. Сия же творит, во еже показати человеку, яко аще бы от святых быша написанная, то помощь подавали быша, а не смущение и искушение. Но трезвенный во ум приводит и апостолов, неверствием смутившихся, егда увидеша Владыку своего и Спаса Христа; назнамена бо им, глаголя: «что смущени есте; и почто помышления входят в сердца ваша» (Лк. 24, 38)? И абие последова словесем Его тишина. Тако и мы, аще в безмолвии сердца прочтем написанная, и обрящем, яко не достизаем сотворити, по писанному, на сто, и на шестдесят: аще не тако, то поне третие, (сиречь) на тридесять. Да разумеем же, яко во всех полезна быша нам написанная, аще и не достизаем сотворити совершенное, наказуемся в предлежащем странноприимства деле, якоже не высокомудрствовати, яко велие нечто творим, обретающе, яко совершенства недостигохом сотворити. Не тако отметающе бываемая ныне от вас, написахом вам содержащаяся в первшем послании, но да в большее приидете, или пребывающе, в нихже есте, смиренным помыслом устрояете дело тое. Да не чудитеся же о искушениих: заповедь бо имамы, яко «радуйтеся, егда во искушения впадаете различна» (Иак. 1, 2). Вопрошен же бысть иногда некий от святых отец от некоего брата: что есть сие, авво, яко, егда хощу уснути, и труждаюся молитву дея, и знаменуя себе (крестным знамением), в тую нощь искушение блуда стражду во сне; аще же не сотворю молитв, ниже назнаменую, не бывает (ми) искушение? И отвеща ему старец, глаголя: яко по хитрости сие творят бесове, во еже отставити тя от молитвы и знамения крестнаго: ведят бо, яко от сих помощь бывает человеку тому. Тако и ты, аще что вопросиши отцев, и на время смутят тя бесове за словеса их, никогдаже да отступиши от вопрошения их; ничтоже бо вредно или тяжко установляют: ученицы бо суть Рекшаго: «иго Мое благо, и бремя Мое легко есть» (Мф. 11, 30). И послежде обрящем плод пользы их, и тогда возопием со Псалмопевцем, глаголющим: обратил еси плач мой в радость мне, и прочая.
Вопрос 700. Случается, мне беседующу с некиим, внезапу парити умом, якоже мнети и вне себе быти, и предлежащаго забывати слова, не преносящуся уму во ино нечто, но изступающу из себе самаго. Что убо есть сие, отче? И что мне подобает творити? Зело бо скорблю.
Ответ. Сие брань есть диавольска хотящи посрамити человека того пред сущими. Аще же со свободою явиши им вещь ону, глаголя: простите мне, парити сотвори мя диавол; посрамится и престанет брань сия; и прочее с трезвением беседуй. Непщуется же ничтоже быти сие. Не разумевающему же мног стыд творить. Память же имене Божия вся совершенно злая упразднит и укрепит немощь нашу. Аминь.
Вопрос 701. Муж некий, христолюбец, воздержлив сый зело, и о своей пекийся душе, посла, вопрошая тогожде старца: что есть полезно творити кому, то ли, еже тому мнится благо, или с вопросом отцев?
Ответ. Аще кто от себе помышляет некое добро творити, а не с вопросом отцев, сей несть законен, и законно ничтоже сотвори. Аще ли же кто с вопросом творит, сей исполняет закон и пророки. Смирения бо знамение есть, еже вопрошати: и Христа, Смирившаго Себе и до раба, подражатель таковый. Муж бо безсоветен, сам себе враг. Глаголет бо: «с советом вся твори» (Сир. 32, 21). И Иоанн Колов глаголет: «Аще видиши юна, своею волею восходяща на небо, удержи его за ногу, и верзи долу». Полезнее есть смиренно вопрошати, нежели своим хотением шествовати. Бог бо есть, влагаяй во уста вопрошаемаго, что да речет, за смирение сердца и правоту вопрошающаго.
Вопрос 702. Аще сежу со отцы, и стязаются о вере с некиим от неправомудрствующих: должен ли есмь и аз стязатися, или ни? Глаголет бо ми помысл: яко аще молчиши, предаеши веру. Аще ли же и тонкая беседа будет в них о догматех, возглаголю ли яже вем, или премолчу? Аще ли же и вопрошен буду, что сотворю?
Ответ. Никогда же да стязаешися о вере: не ищет бо от тебе Бог сего; но точию веровати право, и приял еси от Церкве Святыя на крещении и еже творити заповеди Его. Сия убо сохрани, и спасешися. Беседовати же о догматех не подобает: превосходят бо тебе сия. Но молися Богови о своих согрешениих, и в сих ум твой да упражняется. Блюди же, да не осудиши в сердце твоем беседующих сия: не веси бо аще право они беседуют, или ни, — и яко Бог судит дело то. Аще же вопрошен будеши, рцы, яко сия превосходят мя, и, простите мя отцы святии.
Вопрос 703. Аще же, стязаяся еретик свяжет словом своим православнаго: еда несть добро помощи мне ему, елико могу, да не побежден быв, вредится в православной вере?
Ответ. Аще влагаеши себе побеседовати, то и пред Богом беседуеши, и пред человеки, и обретается, аки учительство. Аще же кто учит, не имый силы, вероятно слово его не бывает, но безплодно. Егда же ничтоже пользуеши, то кая потреба и беседовати? Аще ли же всяко помощи хощеши, возглаголи в сердце твоем Богу, тайная Ведущему и Могущему сотворити паче, яже просим у Него, и Той, по воле Своей, сотворит со стязающимися. А ты смирение обрящеши в деле сем. Якоже бо аще ввержет кто в темницу кого не праведно по власти. Другий же, зря бываемое и не могущ противорещи, или снабдети человека того, отшед тайно, речет некоему сильнейшему, и той, послав своею властию, возмет его, ввергшему смущающуся, не знающу же, кто есть возвестивый. Тако и зде, да приступим ко Богу о вере, и о братиях наших, в молении сердца, и Той, иже клятся Собою, яко всем человеком хощет спастися и приити в познание жизни, сотворит и с ними по воли Своей.
Вопрос 704. Еда должен есмь искати поне разсуждаемая, да известно та увем и не стязаюся?
Ответ. Ничтоже ищи от тех, ихже Бог не взыскует от тебе, ниже да внесеши прибедственна словеса: но буди доволен, якоже рех, исповеданием правыя веры, и ничтоже сего множае любопытствуй.
Вопрос 705. Аще убо от Писаний будет беседа, премолчу ли, или возглаголю? Аще ли же и случится им сумневатися о нечесом, еже аз вем, еда добре есть, да реку, или ни?
Ответ. Молчание лучшо есть. Аще же сумнятся, и веси тое, за еже решену быти сумнению, рцы со смирением, еже вси. Аще же не веси, ничтоже да речеши, аки от своего помысла: безумие бо есть.
Вопрос 706. Аще о вещах будет беседа, не имущих вреда душевнаго, премолчу ли, или возглаголю?
Ответ. Прежде вопрошения несть добро возглаголати. Аще ли же и вопрошен будеши, рцы, еже веси, со смирением и страхом Божиим. Ниже возвышался, аще приято будет слово твое, — ниже скорбя, аще не приято будет: сей бо есть путь Божий. И да не вменишися быти молчалив, рцы от себе и нечто в разуме, и сократи, и избавишися многословия и суетнаго мнения.
Вопрос 707. Аще кто речет ми прокляти Нестория и подобныя ему еретики: проклену ли, или ни?
Ответ. Яко убо Несторий и иже по нем, еретицы под анафемою суть, яве есть: ты же не приходи на проклинание кого отнюд. Имеяй бо себе грешна, плакати должен есть грехов своих, и ничтоже ино. Но ниже судити подобает проклинающия кого. Кийждо же себе да искушает.
Вопрос 708. Аще же кто от сего непщует, яко и аз онаго мудрствую: что реку ему?
Ответ. Рцы ему: аще и яве есть, яко они достойни суть проклинания, но аз грешнейший есмь паче всякаго человека: и боюся, да не како, инаго осуждая, себе осуждаю. Ибо и самаго сатану аще прокляну, понеже творю дело его, то себе проклинаю. Господь бо рече: «аще любите Мя, заповеди Моя соблюдите» (Ин. 14, 15). И апостол глаголет: «аще кто не любит Господа, проклят да будет» (1 Кор. 16, 22). Убо, не творяй заповеди Его, не любит Его: и не любяй Его, под клятвою есть. И како таковый иных может проклинати? Сия рцы ему: и аще пребудет в техжде, совести его ради, прокляни (яко) еретика.
