Ответ. Еже свое сердце умиротворяти, лучше есть. И сие коемуждо приличествует, и блажен сие творяй. А еже примиряти крамолящияся, не есть всякаго, но могущих без (всякаго) вреда сие прейти. Немощный же, радоватися должен о мире всех: не вдавати же себе в ходатайство примирения всякаго (человека), разве любимых ему по Богу. И сие, егда не предлежит ему тщета душевная.
Вопрос 686. Егда по Богу вещь творю, и уничижение приемлю от человек, скорблю, аки соблазняяй их.
Ответ. Аще уничижен будеши не праведно, да не печалуеши. Диавол бо завидит благому, и на пресечение онаго подвизает сия, но послежде упраздняется и во славу ведет дело тое Бог. Аще ли же согрешая, праведна уничижен будеши, стыд себе наносиши: но аще покаешися, в радость сие преложится.
Вопрос 687. Ин христолюбец, зле страждущ от некоего, яви томужде
великому старцу о сем.
Ответ. Благосотвори ему.
Вопрос 688. Сия творя, паки зло страдаше от него, и яви паки старцеви, глаголя: се благотворю ему, и не престает озлобляти мя.
Ответ. Не оному твориши благое, но себе. Господу рекшу: «добро творите врагом вашим, и молитеся за творящих вам напасть» (Мф. 5, 44). Кийждо бо по делу своему приимет.
Вопрос 689. Ин христолюбец, странноприемляй отцы, вопроси тогожде старца: что сотворю, яко присно скорблю, яко аще приходит кто от отец, не обретаю предложити ему нужных вещей?
Ответ. Сей помысл от диавола есть — довлеет бо им предложити обретающаяся, по реченному: довольни сущими, и Бог им извещение подаст. Аще бо кто ищет сих вещей, не может странноприимец быти, но молится никомуже прийти к нему. Аще убо имея что предложити, щадиши е от скупости, аще и тмами угодити им потщишися, не приимет извещения сердце их, разве аще требуеши вещи на иную потребу нужнейшу, или на подаяние негли немощным, или лицам честнейшим. Вся бо подобает творити с разсуждением и страхом Божиим. Аще ли же прилучится и тебе отыти инуде, не чай обрести покоя, и не смутишися. Аще бо возчаеши (обрести), и не обрящеши, то оклеветаеши приемшаго тя; а оклеветание смерть есть душе. Но благодари во всех: сия бо есть духовная и душеполезная пища и покой.
Вопрос 690. Что убо, аще не приимут мя отнюд, и буду утружден от путнаго шествия и требуяй пищи?
Ответ. Воспомяни, кто пекийся о всех, и всех питаяй, яко Бог есть. Аще убо бы хотел Бог напитатися тебе, то подал бы им извещение прияти тя: не приемшим же им, яве есть, яко Бог не хощет, и не суть они повинни. Вся бо бывают во искус и спасение человеку, яко да претерпит и укорит себе во всех, яко недостойна.
Вопрос 691. Ин христолюбец вопроси тогожде старца Иоанна: помысл влагает мне боязнь, яко может диавол сотворити тя согрешити, аще ты и не хощеши; повинен бо ему сотворился, и зело скорблю от сего.
Ответ. О диаволе не думай, яко власть имать на кого: зане вина греха по произволению нашему обретается, а не по принуждению приемшаго власть: якоже убо не имать человек принуждения на спасение, тако ниже на грех. По власти ли прельсти Еву, или по совещанию? Нигде же видится власть. Понеже никтоже смеяше бежати от имущаго власть. Мы убо таковии есмы, якоже человек свободен поработився кому своим произволением, иже временем приходит в себе и кается. И аще не прибегнет к сильнейшему паче его, то не может кто себе избавити. Аще ли же прибегнет, прочее он ведый, яко несть его раб собственный, не смеет что сотворити ему, Крепльшаго ради его. Темже яве есть, яко власти над человеком не имать. И ты убо рцы помыслу тому: яко убо должник есмь, но прибегох к Могущему избавити, и Призвавшему мя, и Глаголющу: приидите ко Мне труждающиися и обремененнии, и Аз упокою вы. И должен есмь всегда бодрствовати, да не паки впаду в руце его. Аще ли же паки речет помысл, и понеже не может тебе принудити согрешити, се безгрешен обретаешися, и отягощает тя от сего помысла, рцы ему: аще речеши мне, ктому не согрешаю, не верую тебе, аще не достигну града (небеснаго). Аще бо кто совершит путь весь, и имать еще едино поприще, и тамо возляжет, то ничтоже пользова: вне бо есть града. Пред Богом убо повержем неможение наше, и Той ти упразднит козни, молитвами всех святых Своих. Аминь.
Вопрос 692. Понеже нивы мои прузи вредят, и аще иждену, окрестнии сварятся с нами: и аще оставлю, потерплю вред. Что сотворю?
Ответ. Возми воду освященную и покропи на нивах твоих. И аще с миром и без свары возможеши отгнати, или закопати, несть ти грех. Аще ли же свара будет, на пользу души твоея остави вещь Богов, и еже будет, волею Божиею будет.
Вопрос 693. Что убо, владыко? Аще всяко восхощем отгнати гнев Божий, не раздражим ли сим Бога?
Ответ. Совершеннии убо не отгоняют его: имут бо всю надежду свою на Бога. Но мы, понеже плотстии есмы и требуем земных вещей; осуждающе себе самех, яко согрешающих в сем, да отженем с молитвою и псалмопением, молящеся Богови, да простит нам, и тщащеся прочее благодарити Ему. Аще бо и сие прейдет, горшая сего нанесут нам греси. И невозможно, без покаяния и милостыни, престати от нас злым; глаголет бо: блажени милостивии, яко тии помиловани будут. И да не речеши, и чесого ради в наказание наше нанося Бог гнев, терпит не кающихся, и отгоняющих его? Бог бо по прещению наносит гнев, да покаемся. И терпит нас отгоняющих (его), чая долготерпением Своим обращения нашего к Нему. Аще бо пребудем в техжде, то, и по еже изгнати, в горшая злая впадем. И исполнится на нас пророческое слово: «врачевахом Вавилона, и не исцеле» (Иер. 51, 9). И несть инаго чаяти, точию муки вечныя, и тмы кромешния, и червия не усыпаемаго, и скрежета зубов.
Вопрос 694. Понеже вино, еже хощу истоптати в моем точиле, жидовско есть: убо не грех ли есть?
Ответ. Аще, егда дождит Бог, на ниву твою дождит, а оставляет жидовскую, то ниже ты истопчи вино тем. Аще же человеколюбец есть ко всем, и дождит на праведныя и неправедныя, почто ты хощеши быти безчеловечен, а не паче щедр, якоже Сам глаголет: будите милосерди, якоже Отец ваш Небесный?
Вопрос 695. Аще кто вверит мне слово некое, завещав никомуже рещи; а другий заклинает мя исповедати ему: что сотворю? Аще бо реку, опечалю уверившаго мне; аще же не реку, оскорблю вопросившаго мя; и паки боюся клятвы.
Ответ. Заклинаяй тя (рещи), той понесет грех. Не подобает бо, вины ради клятвенныя, явити тайну братнюю. Рцы же ему: аще бы ты вверил еси мне слово, было ли бы тебе приятно, да изъявлю тое иному? Аще убо тебе не было бы приятно, то ниже да просиши мя рещи тебе слово братнее. Речено бо есть: еже ненавидиши быти тебе, да не сотвориши ближнему твоему. И паки: еже аще хощете, да творят вам человецы, и вы творите им такожде.
Вопрос 696. Како должен есмь в залозе имети: яко всяк человек праведен, или яко всех человек аз грешнейший есмь? Сумневается бо помысл имети всякаго человека праведна.
Ответ. Имей себе грешнейша и последнейша всех, и имети будеши покой.
Вопрос 697. Егда беседую кому о житии святых отец и о ответех их, велемудрствует сердце мое. Рцы убо мне: како со смиренномудрием беседовати имам? И кому должно глаголати сия? И каким намерением.
Ответ. Егда беседуеши о житии святых отец и о ответех их, должен еси себе осуждати, глаголя: увы мне, како глаголю добродетели отец, и ничтоже стяжах от них, ниже приидох во успеяние? И сижу, глаголя инем, да пользуются? Да не когда на мне исполнится реченное от апостола: научая инаго, себе ли не учиши? И егда сия глаголеши, сгорати будет сердце твое, и обрящешися глаголяй со смирением. Должен же еси внимати, кому глаголеши. Аще веси, яко имать спользоватися, тогда побеседуй. Аще ли же ни, несть потреба беседы. Писано бо есть: блажен глаголяй во уши слышащих. Да не когда обрящешися, подаваяй святая псом и повергаяй бисер пред свиниями. Господь да вразумит тя, брате, еже бы не заблудити от пути смирения.
Вопрос 698. Два христолюбца беста, искренно любяща друг друга о Господе, и от отец в жизни наставляема. От сих един, в собеседовании, рече слово о ином некоем. Другий же, по совосхищению диаволю, помыслив, яко к нему рече, смятеся зело. И оному известна его творящу о сем, не приимаше. И отсюду бывшу между ними малу прекословию приидоста оба ко отцем и явиша томужде старцу дело то.
Ответ. Яко единодушным глаголю вам всю истину пред Богом. Оба должни есте принести покаяние Богу, не леностно, но от всего сердца, да простит вам молитвами святых отец ваших. Ты убо, яко оклеветан быв, не понесл еси поречения онаго, глаголя: яко аз согреших, и весь грех есмь, яко мене ради смятеся брат мой. Сей же, яко не разсуди прежде, неже возглаголати слово оно, яко не к нему речено, и яко ничтоже противно не имел еси рещи до смерти, но и той, якоже ты, обретеся не имый терпения. Обаче вы не имате вещи, но мы есмы виновни злых, яко молитв не имамы. Аще бы быхом имели, покровени быти имели бысте от лукаваго, сеющаго посреде вас плевелы во еже искусити вас. О сем бо молимся, еже вам покровенным быти. Не боитеся ли суда Божия, да не соблазнятся о вас человецы, глаголюще: се чада отцев, како не имут терпения, но друг на друга находят? Аще убо вы стыдитеся друг другу положити метание от сердца, мы положим за вас: нам бо подобает таковый студ. Господь да простит вам, и да сохранит вас от лукаваго, и да сокрушит его под ноги ваша вскоре. Единодушии будите о Господе, и единомысленни, и единоверии. Господь да утвердит вас непоколебимых во страсе Своем. Аминь.
